CEBU, Philippines - Mikabat sa 18 ka paketeng shabu ang nasakmit sa kapolisan gikan sa tulo ka mga suspetsadong pusher atol sa buy bust operation nga ilang gilusad didto sa dalan C. Ouano sa barangay Looc, dakbayan sa Mandaue sa miaging gabii.
Ang nasikop sa mga sakop sa City Anti Illegal Drug Special Task Force (CAIDSOTF) mao sila si Eduard Lapus Soronio, 42, minyo, Rene Sanoria Pepito, ulitawo, 20, ug usa ka menor de edad, kinsa pulos nagpuyo sa maong dapit.
Matud pa ni SPO2 Noval usa ka sakop sa CAIDSOTF nga ang duha ka dinakpan dugay nang namatikdan sa kapolisan sa illegal nga pamatigayon niini sa pagpamaligya og shabu sa maong lugar samtang ang menor de edad maoy gihimo nilang runner.
Si Insp Henrick Bangcoleta, hepe sa CAIDSOTF sa Mandaue City Police Office (MCPO) maoy nangulo sa maong buy bust operation dihang sila si Pepito ug Soronio nagtinabangay sa pagbaligya og shabu ngadto sa police decoy busa sayon kaayo silang nasipong sa kapolisan uban sa 18 ka paketeng shabu ug ang marked money sa kapolisan. Sa pagkakaron nagkagulkol na sila sa prisohan samtang gisang-at na usab ang tukmang kaso batok kanila. (WC) - (BANAT NEWS)