Quisumbing midayeg sa SONA ni P-Noy

CEBU, Philippines - Si 6th District Congressman Gabriel Luis Luigi Quisumbing mitumbok nga nakadayeg siya sa ikaduhang State of the Nation Address (SONA) ni Presidente Benigno Noynoy Aquino III niadtong miaging Lunes ilabina nga gihimug-atan sa presidente ang "matuwid na daan." O tarong nga dalan.

Apan gitataw ni Quisumbing nga daghan og atubangon nga hagit ang administrasyon ni Aquino tungod sa pagtininuod sa paggukod sa mga kahiwian ug anomaliya sa nakalabay nga administrasyon ug pagsubay sa matuod ug makatarunganong pamaagi sa panggobiyerno.

Matud pa ni Quisumbing nga managsama sila ni Aquino og mga panglantaw sa pangatungdanan nga mao ang "accountable government" uban sa mga leader nga tinuoray nga miatiman sa mga Filipino ilabina sa mga kabus ug timawa ug sa ilang malisod nga kahimtang.

"We share in the President's vision of an accountable government, with leaders who genuinely care for Filipinos and their welfare. We believe that giving the poor a chance to improve their lives is important because their progress will be the country's progress," sigun pa ni Quisumbing.

Nasayran nga si Quisumbing naghimo karon og mga programa nga makamugna og dugang trabaho sa mga taga sixto distrito ingon man dugang mga livelihood niadtong walay trabaho gawas sa pagpatuman sa mga importanteng mga infrastructure project nga gikinahanglan aron sa pagpasaka sa ekonomiya sa Sugbo. (BANAT NEWS)