Polis gikulata ngipon nalubo

CEBU, Philippines - Napangag ug nangalubo ang ngipon gawas sa nahiagomang mga bun-og sa lawas sa usa ka polis nga gitabanga’g kulata sa mga estambay sa dalan Leon Kilat ug Sanciangko, dakbayan sa Sugbo sa miaging Sabado sa gabii.

Ang biktima mao si PO3 Jackson Rivera, 35, taga barangay Cabangahan, lungsod sa Consolacion ug nadestino sa Provincial Public Safety Company sa Cebu Provincial Police Office (CPPO).

Giingong si PO3 Rivera misuway og badlong sa grupo sa mga batan-on nga naglalis apan siya na hinuon ang giatubang ug gikulata sa maong grupo.

Gawas sa pagkalubo sa mga ngipon ug pagkabun-og sa lawas, nawagtang pa gyud ang iyang service firearm nga 9mm nga pistola ug pitaka nga dunay sulod nga P20 ug mga ID sa biktima.

Base sa report nga si PO3 Rivera, giingong miadto sa maong lugar kay mopalit og cellular phone alang sa iyang inahan.

Apan sa iyang pag-abot sa maong dapit nga nahitaboan giingong adunay grupo sa mga batan-on ang naglalis hinungdan nga iya kining giduol ug gibadlong uban sa pagpaila nga usa siya ka polis.

Apan imbes nga mokalma ang maong mga batan-on, gidumog na hinuon niini si Rivera ug gitabangan og kulata.

Ang polis nga walay praktis bahin sa self defense nakalitan ug wala makasukol bisan sa paglanit sa iyang armas aron dili mailog, wala gyud makahimo sa ingon.

Maayo nalang kay wala siya tiwasi sa pagpatay kay dihang mikamang na siya sa karsada, nag-iyahay usab sa pagpanagan ang maong mga batan-on pahilayo sa maong lugar.

Si Sr. Supt. Patrocinio Comendador, hepe sa kapolisan sa lalawigan nagkanayon nga gimandoan na niya ang Provincial Investigation and Detective Management Branch (PIDMB) nga mopahigayon og imbestigasyon sa maong insidente.

Matud usab niya nga mo-coordinate usab sila sa Cebu City Police Office (CCPO) aron masikop ang mga mikulata kang PO3 Rivera.  - BANAT NEWS