CEBU, Philippines - Gipahibalo ni Bise Mayor Joy Augustus Young nga dili siya motambong sa State of the City Address ni Mayor Michael Rama karong Hulyo 1 sa Plaza Sugbo apan nagdumili sa pagbutyag sa rason.
“Basta lang,” mao kini ang hirit sa bise mayor kinsa mitataw usab nga tagaan niya og kagawasan ang mga konsehal nga mopakanaog sa ilang desisyon kung motambong ba kini sa SOCA o dili.
Si Young sa dihang nahinabi sa Banat News nagkanayon nga dili na kinahanglan nga mobisita pa si Rama sa sunod nga sesyon sa konseho karong Hulyo kung ibalik niini ang iyang ipanulti atol sa SOCA.
“ Para unsa paman iyang adtuon? kung iya ra balikon ang gipanulti niya sa SOCA,” matud pa sa bise mayor.
Gipanglantawan usab ni Young nga mayoriya sa mga konsehal ang dili motunga sa SOCA. Bisan paman nga giuswag ni Rama sunod adlaw ang giplano niini nga panihapon uban sa mga opisyales sa siyudad, giklaro ni Young nga dili na kini angay tambungan gumikan kay wala mohatag og ideya ang mayor kung unsa ang ilang hisgutan.
Matud pa ni Young nga mosugot siya nga dunay panagtigom basta himuon lang kini sulod sa City Hall.
Samtang si Rama nagkanayon nga dili makaapektar kung gamay ra sa kauban niya opisyales sa siyudad ang motungha sa iyang SOCA gumikan kay alang raman usab sa katawhan ang iyang mensahe.
Si Kongresista Tomas Osmeña mipadayag usab nga dili pa kini seguradong motambong sa SOCA ni Rama gumikan kay wala pa siya kabalo sa estado sa iyang eskedyul sa maong adlaw. (BANAT NEWS)