CEBU, Philippines - Usa ka inahan uban sa 6-anyos niyang anak nangaangol human maigo sa splinter sa shotgun sa guwardiya nga nahulog sa semento ug mibuto didto sa eskina sa dalan V. Rama Avenue ug Lucio Drive sa barangay Guadalupe, siyudad sa Sugbo kagahapon sa buntag.
Ang mga biktima mao sila si Christine Ybañez, 26, ug ang anak niining si Emmanuel Troy Ybanez, 6, nga taga barangay Calamba ning dakbayan.
Samtang ang guwardiya nga maoy nagkupot sa shotgun mao si Felipe Selerio Jr., 24, ulitawo, sakop sa St. Jude Security Agency ug nadestino sa Rattan Center Cebu nga nahimutang sa maong lugar.
Si Selerio mitug-an ni PO3 Victor Ruel Ayuman ug PO3 Geoffrey Gutual sa Homicide Section nga iyahang giablihan ang gate sa ilang buhatan dihang migawas ang sakyanan sa tag-iya sa maong establisemento nga si Mark Arantilla. Samtang naggunit siya sa gate, naggunit usab ang iyang usa ka kamot sa shot gun dihang aksidente kining nahulog sa semento ug mibuto.
Wala tuyoa ang mga boletas nga bala sa maong shotgun nakaigo sa mga biktima nga mao usay paglabay nila sa maong dapit niadtong tungora paingon sa ilang balay gikan sa Bliss Elementary School.
Ang inahan naigo sa splinter sa walang bahin sa bukobuko dapit sa iyang abaga, ug luyo nga bahin sa walang paa samtang ang iyang anak natapsingan ang ibabaw nga bahin sa wala niining dunggan.
Ang mga biktima daling gihatod ngadto sa Vicente Sotto Memorial Hospital.
Ang guwardya kasamtangang gikustodiya sa buhatan sa Homicide Section sa kapolisan samtang nagpaabot sa kihang isang-at sa mga biktima batok kaniya. (BANAT NEWS)