CPPO moabag sa kaso ni Pilapil

CEBU, Philippines - Ang kapulisan sa probinsya motabang sa pagpangita sa suspetsado sa pagdunggab sa kanhi beauty queen ug beteranang Sugbuanong aktres nga si Pilar Pilapil kinsa naluwas sa tinong kamatayon human makaangko’g lima ka samad dinunggaban didto sa Marikina City niadtong miaging semana.

Kini human mitumaw ang reports nga ang usa sa mga suspetsado nagpuyo sa usa sa mga lungsod sa probinsya sa Sugbu.

Si Sr. Supt. Patrocinio Comendador, direktor sa Cebu Provincial Police Office (CPPO) nga nahinabi sa mga tigbalita nagkanayon nga ilang susihon ang maong report.

Matud niya kun tinuod man ang report ila pa unang paabuton ang abiso gikan sa ulohan nilang buhatan apan matag karun ug unya iyahang pahibaw-on ang ulohan nilang buhatan sa ilang operasyon dinhi sa Sugbu.

Hinuon nagdumili pa si Comendador pagtug-an kun asang lungsora nagpuyo sa lalawigan ang suspetsado

Si Pilapil luwas na karon gikan sa peligro human kini madali pagdala sa tambalanan gikan makaplagi sa usa ka hilit nga dapit sa Antipolo City diin siya gihagbong gikan sa iyang sakyanan sa duha ka mga lalaking miilog sa iyang Kia nga awto samtang sila nagkuyog sa iyang pag-umangkon nga si Rossel Rosalem (Peñas).

Si Rosalem nagpabiling missing hangtud karun samtang ang kapulisan didto sa kaulohan mideklarar na nga ang kaubang babaye ni Pilapil maoy gitumbok nga usa sa mga suspetsado sa pagdunggab sa biktima kini human wala gyud mopatim-aw sa kapulisan.

Si Pilapil ikaunom sa napulo ka magsuon kinsa lumad nga taga lungsod sa Liloan amihanang Sugbu.

Si PNP Chief Raul Bacalso mimando sa Criminal Investigation and Detection Group (CIDG) pinangulohan ni Sr.Supt. Samuel Pagdilao nga maoy lead investigator sa carjacking incidents ug sa pagdunggab kang Pilapil.  - BANAT NEWS