Rama mohatag P1.5 milyong tabang sa ERUF

CEBU, Philippines -  Mohatag og P1.5 million nga financial assistance ang kagamhanan sa siyudad sa Sugbo ngadto sa Emergency Rescue Unit Foundation (ERUF) aron ipamalit og life saving equipment.

Ang kasabotan kalabot niini gipirmahan kagahapon nila ni Mayor Michael Rama ug chairman sa ERUF nga si Dr. Pek Eng Lim.

Base sa kasabotan, tipik sa maong kantidad ipalit og life detector camera nga magamit kaayo sa bisan unsa nga katalagman.

Ang maong kahimanan maoy mosusi sa mga lugar nga lisod sudlon sa mga tawo sama sa mga edipisyo nga maigo sa linog unya may mga tawo nga madat-ogan sa ilawom niini.

Gipadayag ni Mayor Rama nga dako kaayo og natampo ang ERUF sa pag-responde sa bisan unsa nga emerhensya busa dili magmakuli ang siyudad sa paghatag og ayuda sa maong grupo.

Samtang mapasalamaton ang Eruf ngadto sa siyudad gumikan kay sukad sa nangaging administrasyon, wala gyud kini maapektohi sa bisan unsang matang sa pamolitika sa mga politikong nagdumala sa dakbayan.

Gisubay ni Lim nga sukad pa sa   administrasyon ni kanhi Mayor Alvin Garcia ug kanhi mayor nga karon Kongresista Tomas Osmeña hangtud na sa pag-abot na karon sa administrasyon ni Mayor Rama nagpadayon ang maayo nilang pakigsandurot sa mga kalihokan sa Eruf.

Gipadayag ni Lim nga ang trabaho sa ERUF mao ra gyud ang pagsalbar sa kinabuhi sa tawo busa dili gyud sila mag-apil apil sa duwa sa politika .

Sa laing, bahin kanunay nga andam ang ERUF kung ipadala sila sa Japan aron motabang sa kahimtang sa mga tawo nga naapektohan kaniadto sa linog apan nag-agad ra usab sila sa kamandoan ni Mayor Rama. Subling gipadayag ni Rama nga maglisod pa siya og padala og medical team ngadto sa Japan gumikan kay dako kaayo og hulga sa radiation didto hangtod karon.

Nasayran nga gihan-ay na sa ERUF ang balig duha ka semana nga food supply sa higayon nga madayon sila paglarga. (BANAT NEWS)