CEBU, Philippines - Mibuto ang lawas sa usa ka welder nga nagtrabaho sa usa ka panimalay human aksidenteng nakahikap og live wire diha sa Aldea Subdivision sa barangay Kalawisan, dakbayan sa Lapulapu alas- 5 pasado ang takna sa miaging Huwebes sa hapon nga maoy hinungdan sa hinanali niining kamatayon.
Kini maoy tubag sa pagkakuryente ug pagkaangol usab sa tulo ka mga tawo sa LS Pension House sa eskina dalan Junquera ug R.R. Landon sa dakbayan sa Sugbo dihang adunay usa kanila nga nakahikap sa livewire diha sa rooftop.
Sa Lapulapu, ang namatay mao si Ritchelle Mejia, 33, taga barangay Lutac, dakbayan sa Naga ug trabahador isip mason -welder sa gitukod nga panimalay ni Karen Casinello nga nahimutang sa nahisgutang dapit.
Si PO1 John Philip Selmaro sa Homicide Section miingon nga base sa gitug-an sa mga kauban sa trabaho gitiwas na lang unta sa biktima pag-welding ang iyang gitrabaho.
Apan aksidente niining nahikapan ang usa ka live wire ug tungod sa kakusog sa boltahe mibuto ang pipila ka unod sa lawas sa biktima. Daling gipawong sa iyang kauban nga mao ang iyang uyoan nga si Danilo Paradero ang linya sa kuryente.
Daling gidala ni Paradero sa tambalanan ang biktima apan si Dr. Roel Banzon sa Lapulapu District Hospital gideklarar kining patay na. Samtang ang laing tulo ka mga biktima sa dakbayan sa Sugbu gidala sa tambalanan ug luwas na ang kahimtang. (BANATNEWS)