CEBU, Philippines - Magdugang og usa ka presinto ang Mandaue City Police Office gumikan sa nagkadaghang mga establisamentong misulbong nga kinahanglang bantayan sa kapolisan. Si Chief Insp. Oscar Monteroyo nga maoy deputy chief for administration dihang nahinabi sa Banat News niadtong miaging adlaw ang mipadayag nga buot si Mayor Jonas Cortes nga anha kini ibutang sa Mandaue Reclamation Area.
Ang maong lugar kaniadto tugwayanan lang og baka ug kanding apan karon nahimutangan na sa Cebu Doctors University, Boardwalk, Parkmall, Cebu International Convention Center (CICC), mga fast food ug uban pa.
Sa pagdagsa sa mga establisamentong patigayon sa maong lugar midaghan usab ang mga tawong mobisita, motrabaho ug uban pang katuyoan sa maong dapit.