CEBU, Philippines - Nabuslot ang dapidapi sa mamasurahay human kini pusila sa guwardiya sa usa ka subdivision kay nasaypang kawatan didto sa sitio Mahayahay, barangay Bankal sa dakbayan sa Lapulapu sa miaging hapon.
Ang biktima mao si Jomar Canete, 18, taga barangay Agus, samtang ang suspetsado, mao si Frederick Arguelo, hingkod, ug guwardiya sa Aldea Subdivision nga nahimutang sa maong dapit.
Matud pa ni PO2 Franklin Bolaquia sa homicide section sa kapolisan sa maong dakbayan nga nanguykoy ang biktima sa gitapok nga basura nga nahimutang sa gawas sa maong Aldea subdivision. Apan kalit kining gipusil sa suspetsado kay nagtuo nga kawatan.
Gihatod dayon ang biktima ngadto sa Lapulapu City District Hospital samtang ang suspetsado padayon pang gipangita sa kapolisan human kini mosibat. - (BANAT NEWS)