CEBU, Philippines - Human sa malampuson nga convention sa Lady Judges sa tibuok nasud sa Pilipinas dinhi sa Sugbo, lain na usab nga convention ang ipahigayon dinhi sa lalawigan karong sunod bulan.
Kini mao ang National Evangelizer Convention (NEC) nga unang ipahigayon dinhi sa Sugbo.
Usa sa nag-organisa sa maong religious convention, mao si Msgr. Frederick Kriekenbeek kinsa nangunay sa pagpahibawo kang Gobernador Gwendolyn Garcia nga ang nahisgutang convention ipahigayon dinhi sa Sugbo sa Abril 27 - 29 ning tuiga didto sa Mariners Court sa Pier 1 ning siyudad sa Sugbo.
Kauban ni Msgr. Kriekenbeek sa pagduol sa buhatan sa gobernador mao si Sister Gelda Pansoy Angel ug uban pang mga madre kinsa nagdala usab og embitasyon sa gobernador nga mamumulong sa ilang opening ceremony.
Si Msgr. Kriekenbeek niingon nga ilang gipaabot nga motambong sa National Evangelizers’ Convention ang kapin sa usa ka libo ka mga Evangelizer sa tibuok nasud.
Sa walay pagduha- duha si Garcia nisanong sa maong imbitasyon kay usa man kini ka relihiyusong kalihukan sa simbahang Katoliko.
Gawas niini, ang gobernador miingon nga iya usab nga gitun-an kun usay iyang ikatabang alang sa kalampusan sa maong kalihokan sa simbahan.
Ang maong tinguha sa gobernador gikalipay pag-ayo ni Msgr. Kriekenbeek ug mga kaubanan. - BANAT NEWS