CEBU, Philippines - Makigtagbo ugmang adlawa si Konsehal Nida Cabrera sa mga representante sa Department of Environment and Natural Resources (DENR7) aron hisgutan ang proposal sa kagamhanan sa dakbayan sa Sugbo nga himoong communal forest ang 150 ka ektarya nga timberland sa pipila ka mga bukirang barangay ning dakbayan.
Ang maong ahensiya maoy makagiya sa siyudad aron masuta kung unsang mga dapita ang puwedeng himoon nga communal forest nga gideklarar na nga timberland sama sa Barangay Buhisan, Toong ug mga silingang dapit.
Sumala pa sa konsehala nga dakong kaayohan ang ikahatag sa communal forest gumikan kay ma-monitor gyud sa nagkadaiyang grupo ang gitanom nila nga mga kahoy.
Naandan na sa Sugbo nga adunay mga kompaniya, organisasyon ug ubang grupo , kinsa kanunay nga mohimo og tree planting. Nagkanayon si Cabrera, nga kung madayon na ang communal forest, mahimo sila makahatag og giya sa mga grupo kung asa ipahigayon ang ilang tree planting.
Dugang pa niya nga angayan nga magtanom gyud ang mga tawo og kahoy aron makatabang sa pagpreserba sa kalikopan.
Si Cabrera kinsa maoy chairman sa committee on environment sa konseho, nanghinaut nga mokooperar ang publiko sa pag-atiman sa kalikopan aron pabilin nga makahanggap og presko nga hangin ang katawhan. (BANAT NEWS)