Tanod sa Sibonga gi-ambusan

CEBU, Philippines - Patay diha-diha ang usa ka tanod human kini pusila sa wala mailhing lalaki samtang paingon na untang mopauli niadtong Biyernes sa hapon diha sa barangay Tubod, lungsod sa Sibonga.

Ang biktima mao si Nestor Blanco, 37-anyos, tanod sa maong barangay nakaangkon og usa ka samad pinusilan sa iyang ulo nga maoy hinungdan sa iyang kamatayon.

Si PO3 Franklin Gako sa Sibonga Police Station nga nahinabi sa Banat News kagahapon nagkanayon nga si Blanco gikan nag-duty sa barangay hall ug naglakaw paingon na untang mopauli apan pag-abot sa bakilid nga bahin sa lugar nga nahitaboan ang nahisgutang kriminal kalit lang mitungha ug dayon mipusil sa biktima.

Matud ni Gako nga base sa ilang nahipos nga mga report si Blanco usa ka maayong tawo ug wala kini nakaaway.

Gituohan sa kapolisan nga posibleng gipareglahan lang ang biktima hinuon nagpahigayon sila og follow-up nga imbestigasyon sa hitabo aron mapiho ang motibo niini ug masikop usab ang kriminal. (EIM) (BANAT NEWS)