CEBU, Philippines - Samaran sa iyang kalawasan ang usa ka babaye human kini gidunggab sa tawong iyang gipaninglan sa utang diha sa barangay Buaya dakbayan sa Lapulapu. Ang biktima mao si Carmen Catagcatag, 30, minyo ug residente sa maong dapit samtang ang suspetsado mao si Joel Ipugon, 46, usa ka trisikad driver.
Matud pa ni Catagcatag ngadto sa kapolisan iyang gipaninglan si Ipugon sa utang niini nga P500 apan nasuko kini hinungdan sa ilang panaglalis.
Tunga-tunga sa ilang lalis kalit gihansakan og gunting sa suspek ang biktima duha ka higayon hinungdan nga nagpakitabang si Catagcatag sa mga silingan ug nadakpan ang suspek.
Bisan diha atubangan sa kapolisan maisugon gihapon si Ipugon nga di mobayad sa iyang obligasyon kang Catagcatag, kasong frustrated homicide ang ipasaka batok kaniya. (BANATNEWS)