CEBU, Philippines - Kritikal ang kahimtang sa usa ka ulitawo human kini dunggaba sa iyang kainom nga silingan didto sa Sitio Upper Bantigue barangay Agujo lungsod sa Daanbantayan sa miaging hapon.
Ang biktima mao si Joseph Zamora, 22 , ulitawo, molupyo sa nahisgutang lugar, samtang ang suspek mao si Dominador Sericon, 46, nga iyang silingan.
Si PO2 Tommy Rondina Tan sa Daanbantayan Police Station mibutyag sa Banat News nga ang biktima ug ang suspek nag-inom ug dihang nangalasbag na nagkalalis.
Ang suspek nga gilupig sa katarungan, milanit sa kutsilyong iyang gitangkil ug gihansak sa tiyan sa biktima dayong sibat.
Matud pa sa kapolisan nga naglalis ang duha kay nasuko ang suspek kay gipugos kini pagpapalit og ilimnon sa biktima.
Gumikan sa katalandugon sa kahimtang sa biktima gibalhin kini sa tambalanan sa dakbayan sa Sugbo gikan sa Daanbantayan District Hospital.
Samtang ang suspek nga nadakpan usab dayon sa mga barangay tanod gipaslak dayon sa kapolisan sa prisohan samtang nagpaabot sa tukmang kiha nga isang-at batok kaniya. - BANAT NEWS