Drug pusher ug masiao usher kagulkol

CEBU, Philippines - Nagtingkagol sa prisohan ang duha ka suspetsadong drug pusher ug masiao usher human sila hidakpi sa kapolisan didto sa lungsod sa San Fernando ug sa dakbayan sa Toledo sa miaging adlaw.

Ang drug pusher nga nasikop mao si Geronimo Canicon, 44, minyo, residente sa sitio Lacaron, barangay Pitalo, lungsod sa San Fernando, samtang ang masiao usher usab nga nadakpan mao si Ric dela Cerna Bendonillo, 40 nga taga barangay Luray 2, dakbayan sa Toledo.

 Si Canicon nasikop pinaagi sa mga kapolisan nga mipahigayon og saturation drive didto sa Lacaron, sa miaging gabii.

Nasakmit nila ni SPO1 Procolo Ando Jr., PO3 Glen Burlas ug PO1 Salvador Saavedra ang duha ka paketeng shabu gikan sa posisyon ni Canicon.

Samtang si Bendonillo, nasakmitan usab og mga tiket sa masiao, salapi nga halin niini ug uban pang kahimanan sa illegal nga sugal.

Si SPO1 Francisco Salubre sa San Fernando Police Station nga nahinabi sa Banat News mibutyag nga nakadawat sila og report gikan sa usa sa mga residente sa Lacaron kabahin sa ilegal nga pagpamaligya og ginadiling drugas sa ilang dapit.

Ang nahisgutang mga polis daling mipahigayon og saturation drive dihang nabantayan nila si Canicon nga miguho gikan sa ngitngit nga bahin sa maong lugar.

Ang grupo ni Ando miduol kang Canicon ug nagpailang mga polis apan ang suspetsado giingong misuway sa pagdagan apan dali kining nasignit sa mga polis ug na-recover gikan sa posisyon niini ang nahisgutang mga drugas.

Matud usab ni Salubre nga nasikop na nila kaniadto si Canicon sa mao gihapong kalapasan mga tulo na ka tuig ang nakalabay apan nakapiyansa kini.

Sa laing bahin, si Senior Inspector Rully Lauron, deputy chief sa Toledo City Police Station mibutyag sa Banat News nga si Bendonillo nadakpan nila didto sa sitio Planta, barangay Poblacion, sa dakbayan sa Toledo. Naimbargo gikan kang Bendonillo ang lima ka puting papel nga adunay nagkalain-laing kombinasyon sa numero, usa ka ginamit nga carbon paper, duha ka lapis ug P320 nga kwarta nga gituohang halin sa tiket sa masiao.

Si SPO4 Gil Lastimosa nga nahinabi sa Banat News nagkanayon nga si Lauron nagpahigayon og surveillance kang Junior Cahocsan kinsa giingong usa ka financier sa masiao sa maong dapit.

Si Bendonillo kinsa nagsakay og motorsiklo naatlan ni Lauron nga miabot ug mihunong atubangan sa gate sa balay ni Cahocsan ug nanawag ug nagkanayon nga “mo remit ko”. Si Lauron miduol kang Bendonillo ug nagpailang polis apan ang suspetsado misuway sa pagdagan apan nagunitan kini sa polis.

Matud ni SPO1 Lastimosa nga si Bendonillo misuway usab kini og sukol kang Lauron tungod kay dili gustong magpadakop.

Sa pagkakaron mikagulkol na usab kini sa prisohan. - BANAT NEWS