CEBU, Philippines - Mihimo na og linaing imbestigasyon ang Department of Interior and Local Government (DILG)-7 batok kang Medillen Mayor Ricky Ramirez kansang pangalan naduhig sa kamatayon sa iyang sakop niadtong Lunes sa gabii.
Matud ni DILG-7 director Pedro Noval dihang nahinabi sa Banat News iyaha nang gimando ang pagpahigayon og fact finding investigation nga tapuson sa labing daling panahon kabahin sa insidente. Gipasabot ni Noval nga ang mahipos nila nga mga ebidensiya ug impormasiyon sa gihimong pakisusi ang ilaha kining iduso ngadto sa buhatan sa Ombudsman Visayas o ba kaha sa kapulisan aron makatabang pagpalig-on sa nagpadayon niining imbestigasyon.Matud ni Noval tumong niini aron mapapas ang mga katahap ug pagduda nga dunay pagpinig ang himuong imbestigasyon ilabina kun ang mga malambigit niini mga dagkong opisyal sa gobiyerno sama sa mayor.Gipasalig usab ni Noval nga way ‘white wash’ nga mahitabo sa ilaha karung lina-ing pakisusi nga gihimo ug dili usab kini maka-apektar sa nagpadayong imbestigasyon karun sa kapulisan. Hinuon gipanalipdan ni Noval si Ramirez may labot sa pagdumili niini nga mapaubos sa paraffin test gumikan kay iyaha man kining Constitutional Right. Si Ramirez sa gipadalang text message niini sa Banat News niadtong Miyerkules hugtanong mihimakak nga siya maoy nakapusil patay sa biktima nga si Edelberto Abao.
Apan si Cebu Police Provincial Office (CPPO) chief Sr. Supt. Erson Digal mirelibo sa hepe sa Medillen Police Station nga si Sr. Insp. Bonifacio Arriesgado tungod sa kapakyas dayun pagpadangat og spot report sa nahitabo. – BANAT NEWS