CEBU, Philippines - Patay ang usa ka kagawad sa barangay ug angol ang laing batan-ong kauban niini human sila mangatagak sa pangpang uban sa ilang gisakyang motorsiklo diha sa barangay Obo lungsod sa Dalaguete niadtong milabay’ng adlaw.
Ang namatay mao si kagawad Veronico Osorno, 34, sa barangay Corro sakop sa maong lungsod samtang ang angkas niining naangol usab mao si Ryan Bingcoleta, ug molupyo sa barangay Mantalongon, Dalaguete.
Matud ni PO2 Cerelo Glipa sa Dalaguete Police Station dihang nahinabi sa Banat News, ang mga biktima gikan sa barangay Obo nga atol usab nga nagsaulog sa kapistahan niadtong tungura paingon na unta sa Poblacion.
Gikataho nga kusog ang pagpadagan niini sa motorsiklo nga nag-angkasay nga pulos wala magsul-ob og helmet ug pag-abot sa maong lugar nalahos kini sa pangpang nga dunay gibana-banang kapin 20 ka tiil ang gilawmon.
Apan bisan paman sa ilang pagkahagbong ug pagkaangol giingong nakasaka pa og balik sa karsada ang duha maong naagian sa ubang motorista ug gidala sa tambalanan sa Dalaguete apan giingong gideklarar nga dead on arrival si Osorno samtang gibalhin sa tambalanan dinhi sa dakbayan sa Sugbo si Bingcoleta.
Gituohan nga nakainom ang duha samtang nagmaneho tungod kay sila gikan pa namista. (BANAT NEWS)