CEBU, Philippines - Miangkon si Cebu Arsobispo Ricardo Cardinal Vidal nga nagpalaban siya ni Pope Benedict XVI kabahin sa pakigbisog sa Simbahan batok sa kontrobersiyal nga Reproductive Health Bill nga gisugdan na karon og hikay didto sa Kongreso.
Si Vidal uban ni Manila Archbishop Gaudencio Cardinal Rosales mitambong sa tigom sa mga Arsobispo sa tibuok kalibutan didto sa Vatican City niadtong Nobiyembre 20.
Ug didto nakahigayun si Vidal nga pangayuan og tambag ang Santo Papa mahitungod sa RH Bill nga gihingusgan karon nilang supakon.
Sa report sa Balitang Bisdak niadtong Martes, si Vidal mibutyag nga mipasalig ang Santo Papa nga ihatag ang suporta sa kausa sa simbahan batok sa RH Bill nga gihulagway nila nga dakung kontra sa pagtulun-an sa simbahan ilabi na ang paggamit sa mga kontraseptibo.
“We should continue our fight against this, because this (RH Bill) is against the teaching of the church,” matud pa ni Vidal.
Tungod niini, nakapuntos karon ang mga anti-RH bill Advocate kinsa kasamtangang mipalig-on sa ilang baruganan didto sa kongreso aron hingpit nga mabasura ang maong balaodnon.
Kahinumduman, nga naukay ang tibuok simbahan dihang migawas ang giingong pamahayag gikan mismo sa Santo Papa nga miuyon na paggamit sa condom, apan daling midepensa ang simbahan nga miklaro nga nasayop lang pagsabot ang maong nagsulat sa tinuoray nga mensahe sa Santo Papa.
Giawhag usab ni Vidal ang tibuok simbahan ug mga katoliko nga mag-ampo aron malamdagan ang huna-huna sa mga kongresista ilabi na kadtong pabor sa RH Bill. - BANAT NEWS