Basillote napiling ABC president sa Talisay

CEBU, Philippines - Ang kandidato sa pagka-presidente sa Association of Barangay Captain (ABC) sa dakbayan sa Talisay nga kaalyado sa oposisyon gipilde sa kaalyado sa administrasyon atol sa gipahigayong piniliay kagahapon.

Si Marlowe Dagohoy sa barangay Pooc maoy kandidato sa oposisyon kinsa nakakuha lang og unom ka botos itandi kang Kapitan Charles Basillote sa barangay Dumlog kinsa nakakuha og 15 ka botos.

Si Basillote mibutyag sa mga tigbalita nga pito ka kapitan ang kaalyado sa oposisyon apan usa kanila wala motungha kagahapon sa buntag sa gipahigayong eleksiyon.

Ang nahisgutang eleksiyon kansang mga botante igo lang sa pagpataas sa ilang kamot alang sa kandidato nga ilang botohan, didto ipahigayon sa peoples hall sa city hall nga gisaksihan sa hepe sa kapolisan sa dakbayan, mga representante sa religious sector ug academe, ug taga media isip mga observer.

Kini pinaagi sa pagtugot ni Bertillo Pasilang   ang opisyal sa Department of Interior and Local Government (DILG) sa Talisay.

Ang napiling mga opisyal sa ABC kinsa pulos kaalyado sa administrasyon mao si Kapitan Perla Cabanes sa barangay Tanke, kinsa maoy nahimong bise ni Basillote, secretary si Marieta Bucao sa barangay San Isidro nga asawa ni Bise Mayor Alan Bucao, treasurer si Deliah Ybañez sa Lawaan III, auditor si Raul Cabañero sa barangay Bulacao.

Ang walo ka mga Board of Directors mao sila si Kapitan Maning Cabriana sa barangay Tabunok, Joel Obiso sa Jaclupan, Antonio Cabrera Jr., sa San Roque, Jose Juarez sa Tapul, Nicasio Hermosa sa Cansojong, Dorotheo Emit sa Pooc, Marc Ferdinand Bas sa Lagtang ug Renato Manayon sa Manipis.

Human sa eleksiyon ang nahisgutang mga kapitan milahos ngadto sa buhatan ni Kongresista Eduardo Gullas sa University of the Visayas sa dalan Colon, dakbayan sa Sugbo diin gipahigayon ang ilang paghural ug si Gullas maoy mipahural kanila. – BANAT NEWS