CEBU, Philippines - Sa katapusan nasikop na gyud ang gitumbok nga notadong drug pusher didto sa barangay Pooc, sa lungsod sa Sta. Fe, isla sa Bantayan niadtong Huwebes sa alas 9:00 sa buntag.
Ang nasikop human sa usa ka buwan nga pagpaniid mao si Giovanni Sansorjo Lecardo, 29, ulitawo, apan adunay kapuyo, nga taga Bantayan
Si PO2 Eric Illustrisimo sa Sta Fe Police Station mibutyag sa Banat News nga human madawat nila ang taho kalabot sa kalihukan sa suspetsado gilusad dayon nila ang subsob nga pagpaniid sa kalihokan sa suspetsado.
Una nila ipahigayon ang buy bust operation, ila unang gisabotan nga ang polis nga magsilbing mao kunohay ang mopalit og shabu mao si PO2 Marino Cajes kinsa bag-ohay pang nadestino sa maong lugar ug dili kaayo ilado sa katawhan ilabi na sa suspetsado.
Unya nagkasabot dayon ang suspek ug si PO2 Cajes nga mag-abot sa luyong bahin sa pinuy-anan sa nahauna aron adto didto ipahigayon ang transaksiyon.
Dihang gitunol na ni PO2 Cajes ang P900 nga bayad sa duha ka gagmay’ng pakite sa shabu ngadto sa suspek ug gitunol na usab sa suspek ang shabu ngadto kang Cajes, giposasan dayon sa kapolisan ang suspetsado ug gidala ngadto sa buhatan sa mga otoridad.
Kasamtangang gibalhog ang suspetsado sa prisohan sa kapolisan samtang gihikay ang kasong ipasaka batok kaniya. (BANAT NEWS)