CEBU, Philippines - Samdan ang usa ka tawo human pusila sa polis kay midagan dihang dakpon unta kini gumikan kay nagtong-it didto sa sitio Mahayahay, barangay Bankal, dakbayan sa Lapulapu sa miaging gabii.
Ang napusilan sa mga sakop sa Special Weapons and Tactic (SWAT) mao si Feleciano Malingin, 34 , nga taga Lapulapu.
Sa imbestigasyon nga gihimo nila ni PO3 Dioscoro Arong sa kapolisan sa Lapulapu, nasayran nga nagsilbi og warrant of arrest ang team nga gipangulohan ni Inspector Jocyson Paralag kang Rodney Cabahug, ug Glennsolane Codienra, nga gikaduwa og tong-it ni Malingin niadtong tungora.
Dihang gisignit na sa kapolisan ang duha gumikan sa kasong murder, si Malingin kinsa nakurat, mikabad og dagan , mikatkat sa usa ka sementadong koral ug milanit sa iyang gitangkil nga armas de fuego maoy hinungdan nga gipusil siya sa usa ka SWAT.
Si Malingin kinsa naigo sa bukton ug kilid daling gihatod ngadto sa Lapulapu District Hospital ug iniggawas niya ibalhug siya og diretso sa prisohan gumikan sa pagtangkil og armas nga walay lisensya. – BANAT NEWS