2 Provincial police director patubagon
CEBU, Philippines - Duha ka provincial directors sa Central Visayas ang gipatubag karun sa Deputy Director for Operation sa Police Regional Office-7 gumikan sa kataas sa ilang crime statistics sugod niadtong bulan sa Mayo nga nagsingabot ang National ug Local Election ingon man sa Barangay ug SK niadtong bulan sa Oktubre.
Si Sr. Supt. Louie Oppus mikuwestyon karun nila ni Sr. Supt. Erson Digal pangulo sa kapulisan sa probinsya ug ingon man ang provincial director sa Bohol Provincial Police Office (BPPO) nganong taas ang crime rate nga unta aduna may kamanduan ang rehiyonal nga buhatan nga kinahanglan ang random checkpoints ug police visibility nga ipahigayon matag adlaw’ng tanan.
Natingala si Oppus nga labihang taasa sa CPPO ug BPPO gikan sa bulan sa Mayo hangtud sa Oktobre diin anang mga panahona aduna nay gunban nga gipatuman.
Si Oppus nagkanayon nga kinahanglan niya ang tubag sa duha ka provincial directors sa madaling panahon.
Si Digal sa iyang bahin mipadayag nga andam siya motubag ug mopasabot ngadto kang Oppus nganong nitaas ang kremin sa probinsya.
Matud ni Digal ang pagsaka sa krimen sa probinsya wala kini magpasabot nga wala siya motuman sa kamanduan ug ngadto sa iyang mga sakop.
Hinuon gitataw ni Sr. Supt. Patrocinio Comendador, kanhi director sa kapulisan sa dakbayan ug karun maoy hepe sa Regional Investigation and Detective Management Branch (RIDMB) nga sa kinatibuk-an Central Visayas miubos og 25 porsiyento ang crime statistics sa non-index ug index crime sugod sa bulan sa Enero hangtud sa Oktobre kun itandi sa susamang mga bulan sa miaging tuig. (BANAT)
- Latest
- Trending