CEBU, Philippines - Angol ang usa ka drayber sa habal-habal human kini pusila sa wala hiilhing kriminal didto sa sitio Kimba, barangay San Roque, dakbayan sa Talisay kagahapon sa alas 5:00 sa kadlawon.
Ang biktima giila sa kapolisan nga si Jimmy Racasa Rehasajo, hingkod nga taga sitio White Road, barangay Inayawan, dakbayan sa Sugbo.
Sumala ni PO2 Henry Mata sa Talisay City Police Office nga naghatod og pasahero ang biktima ngadto sa Kimba, gikan sa Inayawan dihang pag-abot sa maong lugar may mipara kaniyang usa ka tawo.
Sa pagtuo nga mosakay ang maong tawo, iya kining gibalibaran kay may pasahero man siya .
Apan matud pa kalit lang milanit sa iyang armas de fuego ang maong tawo ug dayong pusil ngadto sa biktima.
Maayo gani kay ang tuong bukton ra sa biktima maoy nasabak sa bala ug nakapadagan dayon siya sa iyang motor pahilayo sa maong lugar.
Midiresto siya ngadto sa Talisay District Hospital (TDH) apan gibalhin siya ngadto sa Vicente Sotto Memorial Medical Center sa dakbayan sa Sugbo aron patambalan ang iyang samad ug ang security guard na sa TDH maoy mitawag sa kapolisan sa sa Talisay.
Si PO2 Mata may katahap nga atraso sa biktima ang mipusil kaniya ug maayo nalang kay wala siya maantimano. (BANATNEWS)