Brodkaster gisukmag sa kaubang mediaman

CEBU, Philippines - Media consultant sa Kapitolyo ug brodkaster nga si Sam Costanilla mipasangil nga gisukmag sa laing mamahayag human sila nagkaabot sa usa ka food chain diha sa may dalan Jones Avenue ning dakbayan sa miaging hapon.

Si Costanilla, Capitol Consultant on media affairs ug freelance commentator, nagpuyo sa barangay Inayawan ning dakbayan midangop sa Fuente Police Station ug mireklamo batok ni Dan Nolasco, 86, taga Inayawan, kanhi miyembro sa Cebu Association of Media Practitioner (CAMP).

Si Engr. Gregorio Senining nga kauban ni Costanilla sa pagsumbong ngadto sa Fuente police station nahinabi sa Banat News nga nagsabot sila nga mag-abot sa usa ka food chain diha sa nahisgutang lugar. Apan giingong adunay mi-text kanila nga miluwat og pulong si Nolasco nga dili lang magpakita kaniya si Costanilla, tungod niini ilahang gipahibalo si Costanilla sa maong bahad.

Base sa police blotter, mao pay pagkanaog ni Costanilla sa iyang sakyanan dihang giduol ug gihagit kini ni Nolasco og sumbagay.

Si Costanilla nga nahinabi sa Banat News pinaagi sa telepono nagkanayon nga walay daghang pangutana si Nolasco nga miduol kaniya dayong sukmag sa iyang tiyan. “Without provocation, giduol ug gisukmag ko niya,” matud pang Costanilla. Nagtuo si Costanilla nga nasuko si Nolasco sanglit niadtong Martes gipadad-an niya kini og suwat nga nagpahibawong gi-terminate na kini isip miyembro sa CAMP.

Apan si Nolasco nga nahinabi usab sa Banat News pinaagi gihapon sa telepono mitug-an nga nakahibawo nang daan ang mga miyembro sa CAMP sa iyang background ug aduna pay apelar sa korte ang maong kaso.

Si Nolasco niingon nga nakadawat na siya nga gi-terminate siya sa CAMP apan ang iyang gikasuk-an mao nga giapil iyang pamilya sa unod sa termination letter niini nga gidawat sa iyang anak niadtong Martes.

 Si Costanilla mipadayag hinuon nga wala siyay planong mopasaka pa og kaso kang Nolasco. (BANAT)