Balay nahugmak sa lahug

CEBU, Philippines - Usa ka balay ang nahugmak padulong sa ubos tungod sa gidudahang karaang tunnel panahon pa sa ikaduhang kalibutanong gubat diha sa sitio Maracas sa barangay Lahug ning dakbayan kagahapon sa hapon.

Ang panimalay kansang kusina, kan-anan ug kasilyas nahagbong sa bangag gipanag-iya ni Emma Auditor,46, kinsa kapin sa 20 na ka tuig nga nagpuyo sa maong lugar.

Ang maong balay duol ra sa nahimutangan sa balay nga gipanag-iya ni Susan Regidor nga nahugmak gihapon sa maong tunnel niadtong bulan sa Hunyo maong gipasibog ang ilang balay.

Matud pa ni Auditor nga sukad sa pagkahugno sa balay ni Regidor kanunay na silang nagbantay og maayo tungod kay namatikdan nilang naghinay-hinay og liki ang ilang mga bungbong.

Ang balay ni Auditor ginama sa kongkreto diha sa first floor ug kahoy sa second floor ug kini gidudahang nagpatong gihapon sa usa ka tunnel diha sa ilawom maong kini nahugmak.

Gibutyag ni Auditor nga kusog kaayo ang pagbunok sa uwan niadtong Sabado sa gabii ug gidudahang mao kini ang hinungdan nga mihumok og maayo ang yuta ug nakaingon sa paghugmak.

Matud pa ni Auditor, diriyot pang mahagsaan sa ilang balay ang iyang 13-anyos nga anak nga si John Rei nga iyahang gisugo pagkuha og ahos diha sa kusina alang sa iyang gilutong sud-an.

Apan pipila nalang ka tikang sa kusina kalit nga nahagsa ang ilang salog paubos lakip na ang ilang kasilyas.

Si Auditor mibutyag nga ang iyang anak nianang sayo kagahapon nakabantay nga adunay mga nangatagak nga semento sa ilang kusina ug gikomedyahan ra niya kini og tubag nga ‘pasagdan nalang kay tingale mahugmak na kini.’

Ang mga sakop sa Bureau of Fire Protection daling miresponde sa maong dapit aron pagsusi sa sitwasyon. Gitambagan silang pabalhinon nalang una og kapuy-an.

Apan si Auditor mibutyag nga dili una sila mopahawa ug diha lang sila mangatulog sa gawas sa ilang balay samtang nagpaabot sila sa hinabang gikan sa dakbayan.

Kini bisan paman gipahimangnoan na sila niadtong nahitabo ang pagkahugmak sa balay ni Regidor nga kinahanglang mamalhin sila og kapuy-an gumikan sa mga tunnel nga wala pa madiskubrehi sa maong lugar.

Ang mga tunnel gituohang gigamit kaniadto sa ikaduhang kalibutanong gubat ug gituohang daghan pa niini ang wala pa madiskubrehi nga natabunan lang og yuta ug natukoran og kabalayan sa ibabaw.

Si Bolivar Artiaga sa Philippine Atmospheric, Geophysical and Astronomical Services Administration sa Mactan miingon nga walay bagyong misulod sa Pilipinas ug ang pagbunok sa uwan nga nasinati karon usa lang ka inter-tropical convergence zone bunga sa panagtagbo sa mga hangin gikan sa nagkalain-laing direksyon nga nagmugna og mga pag-ulan. ( Ug Lesley Caminade)  (BANATNEWS)