Patay'ng babaye sud motel

CEBU, Philippines - Usa ka wala mailhing babaye ang napalgang patay sulod sa Hidden Lodge nga nahimutang sa dalan BB Cabahug sa barangay Guizo, dakbayan sa Mandaue alas-7 pasado ang takna kagahapon sa buntag.

Si PO3 Dionesio dela Peña sa homicide section sa Mandaue City Police Office (MCPO) miingon nga ang maong patay’ng lawas napalgan sa room boy nga si Christopher Sarmiento.

Matud pa ni Dela Peña nga ang patay’ng lawas sa wala hiilhing babaye nagsul-ob pa sa iyang maong nga karsones, t-shirt ug kompleto pa sa panty ug bra nga nagbuy-od sa sawog gawas lang sa tsinelas o sapatos sa maong babaye nga wala na igkita.

Giingong niadtong Sabado sa alas-7 sa gabii usa ka lalaki ang mi-check in sa maong lawak apan wala kini babayeng kuyog.Nagtuo karon ang kapolisan nga posibleng misunod lang ang maong babaye.

Tungod kay milapas naman sa oras gisusi sa roomboy ang lawak apan nakurat kini paglili sa pultahan nga nagbuy-od na ang maong babaye. (BANAT)