CEBU, Philippines - Usa ka habal-habal drayber ang gidunggab sa iyang pasaherong mipakyaw kaniya ug pagkahuman gidala pa ang iyang motorsiklo apan gidemalas ang suspek human mabangga sa kural sa barangay hall ug nadakpan.
Nahitabo kini sa miaging alas 10:30 sa buntag diha sa barangay Pulangbato ning dakbayan human ang biktima nga si Stephen Ian Cutab, 23, gidunggab duha ka higayon sa bukobuko.
Ang suspek nga anaa sa tambalanan giila nga si Melchor Dayondon Sotto, 34, usa ka construction worker ug residente ra sab sa sitio Sampaguita Purok 3 sa samang barangay sa lungsod sa Consolacion ug silingan ra sa biktima.
Sa gihimong imbestigasyon ni SPO2 Roger Nedamo ug mga kauban sa homicide section, ang suspek miduol kaniya ug mihangyo nga magpahatud sa Pulangbato.
Apan pag-abot sa maong dapit gihunong sa suspek ang motorsiklo kay aduna kini kuhaon ug miingon nga magpahuwat kini, tuod man mibalik ang suspek ug walay igong hinungdan gidunggab makaduha ka higayon si Cutab ug dihang nahagba ang naulahi gisakyan sa suspek ang motorsiklo aron moikyas.
Ang biktima kinsa gitabang sa mga tawo aron dad-on sa North General Hospital nahiagi sa barangay hall ug nasigpatan niini ang suspek hinungdan nga dali kining mitudlo kang Dayondon nga maoy midunggab kaniya ug mikarnap sa iyang motorsiklo.
Hinungdan nga ang mga tawong miatiman kang Dayondon nga mga sakop sa Lupon ng Tagapamayapa nga sila si Fructuoso Mino ug Pascual Ardo miaresto dayon kaniya ug mi-turnover kaniya kang SPO4 Danilo Abella sa Talamban Police station. – BANAT NEWS