2 maestro gipamusil, 1 namatay

CEBU, Philippines - Patay ang usa ka maestro ug naangol ang laing magtutudlo dihang gipamusil atol sa pagpanggawas sa ilang klase diha pa sa sulod sa Tubod Elementary School sa barangay Tubod lungsod sa Minglanilla niadtong Lunes sa alas 5:00 sa hapon.

Ang namatay mao si Serafin Villahermosa, 36, molupyo sa Gorordo Avenue sa dakbayan sa Sugbo ug ang naangol nga magtutudlo mao si Roger Barleso Maunes, 41, taga Springwoods, Tulay, Minglanilla.

Samtang ang mga mamumuno gihulagway lang sa mga nakasaksi nga nagsakay og motorsiklong walay plate number ug ang usa niini nagsul-ob og itom nga jacket ug nag bonnet.

Matud pa ni PO2 Jade Abrica sa Minglanilla Police dihang nahinabi sa Banat News padulong nang mogawas ang duha dihang gisugat sa mamumuno dayong pusil kanila.

Sumala pa nga kauban pa ni Villahermosa ang iyang 13-anyos nga anak dihang gipusil makadaghang higayon ug pagkahuman gisunod sa pagpusil si Maunes ug nagdali paggawas ug misakay og balik sa nagpaabot nga motor ug mipasirit palayo.

Daling gihatud sa South General Hospital ang mga biktima apan gideklarar nga dead on arrival si Serafin gumikan sa kadaghan sa mga samad pinusilan niini sa dughan, samtang si Maunes naigo lang sa tuong bukton.

Si Sr. Supt. Erson Digal, director sa Cebu Provincial Police Office mibutyag nga magpatabang sila sa mga imbestigador sa Cebu City Police Office gumikan kay ang kapikas sa namatay’ng maestro testigo sa pagpatay sa usa ka negosyanteng si Lalaine Jore diha sa barangay Camputhaw ning dakbayan niadtong 2008.  – BANAT NEWS