CEBU, Philippines - Samdan ang usa ka drama talent sa Cebu Catholic Television Network (CCTN) human kini tigbasa og sundang sa tigbantay sa usa ka parkinganan sa dalan Pelaez barangay Sto Niño ning dakbayan sa Sugbo sa miaging gabii.
Ang biktima mao si Ramon Dela Cruz, drama talent sa CCTN nga taga Tabo sa Banay, barangay Kalubihan, ning syudad, samtang ang suspetsado nailhan lang sa ngalang Junel, tigbantay sa parkinganan sa mga motor duol sa usa ka sinehan.
Sumala sa kapolisan nga ang biktima ug ang suspetsado nagka-away kalabot sa pag-parking sa motor sa biktima.
Ang suspetsado nga gihagad og sinumbagay sa biktima, wala mosukol apan milanit sa iyang sundang ug gihabas ang biktima maayo nalang kay napulso ra pagkaigo. Gihatod dayon siya sa CCMC samtang ang suspetsado nakasibat.