Habalhabal, taxi gi-karnap

CEBU, Philippines - Milampos ang duha ka tulisan sa pag-karnap sa usa ka motorsiklo sa usa ka habalhabal driver sa UN Avenue barangay Alang-Alang, dakbayan sa Mandaue sa milabay’ng gabii, samtang usa ka taxi gi-karnap sa tulisan human gitulis ang drayber niini.

Ang gikuhaan og motorsiklo mao si Jobet Talaboc, 20, taga Cansaga, Consolacion.

Matud ni Talaboc nga misakay kaniya ang duha ka lalaki ug buot magpahatod sa Canduman apan nausab ang hukom ug buot magpahatod sa dakbayan sa Lapulapu.

Sa dihang gihatod ni Talaboc ang duha ka pasahero sa Lapulapu, pag-abot sa UN Avenue usa sa tulisan mition kaniya sa usa ka armas ug gipakanaog siya.

Ang duha ka lalaki dali nga nakapahilayo sa maong dapit gamit ang iyang motorsiklo nga Honda Wave nga pula nga may plaka nga GS 5418.

Gihulagway ni Talaboc nga ang usa ka tulisan batan-on pa kini nga anaa sa 20 kapin ang panuigon samtang ang usa anaa sa mga 30 kapin ang pangidaron nga maoy mition ngadto kaniya.

Samtang usa ka taxi gi-karnap sa sitio Barlaps, barangay Banilad, dakbayan sa Mandaue kagahapon sa kaadlawon.

Ang drayber niini mao si Victor Appari, drayber sa Ken taxi nga adunay plaka nga GWR 395.

Si Appari nga personal nga mitaho sa kapolisan sa Station 4 misaysay nga usa ka lalaki ang misakay sa iyang taxi nga gimaneho sa AC Cortes Avenue, dakbayan sa Mandaue ug buot kining magpahatod sa Centro, Mandaue.

Pipila ka gutlo, nakurat si Appari sa dihang gitionan kini og armas sa iyang liog dayong deklarar ang iyang pasahero nga tulis.

Gumikan sa kahadlok, iyang nahatag ang iyang kinitaan nga P1,800 diin dili pa gyud igo gipakanaog kini sa iyang sakyanan ug gimaneho sa tulisan ang iyang taxi.

Ang taxi nakit-an sa kapolisan sa dalan Zamora, likod nga bahin sa City Hall sa dakbayan sa Mandaue apan ang tulisan nakabiya na sa maong dapit. Ang kapolisan padayong nag-imbestigar sa duha ka insidente. – BANAT NEWS