Mikulata sa asawa gidakop

CEBU, Philippines - Usa ka 42-anyos nga lalaki nga gipasanginlang namun-og sa iyang asawa ang nagtingkagol sa Talisay City detention cell human dakpa sa kapolisan ug nakuhaan usab og mga drug paraphernalia kagahapon sa kaadlawon diha sa Carmen Village, barangay Poblacion, dakbayan sa Talisay. Ang gipadakop mao si Alejandro Misa, residente sa maong lugar gireklamo sa iyang asawang si Mitzi, 37. Si Alejandro nasikop nila ni PO2 Joy Delosa ug PO2 Rodrigo Inoc sa Regional Intelligence Division (RID) sa Police Regional Police Office (PRO)7. Base sa imbestigasyon ni PO3 Eric Enad sa Talisay City Police Station nga si Mitzi dihang gibun-og kini sa iyang bana nakahigayon kini og tawag sa iyang mga igsuon ug nangayo og panabang. Ang mga igsuon ni Mitzi mao nay mitaho ngadto sa kapolisan sa PRO 7 hinungdan nga ang nahisgutang duha ka polis daling mibutho diha sa balay sa pamilyang Misa ug naabtan pa kining namun-og kang Mitzi. Sa gipahigayong body search na-recover ang nahisgutang drugs paraphernalia. – BANAT NEWS