CEBU, Philippines - Duha ka enumerators sa National Statistics Office (NSO)-7 ang mihunong sa ilang house-to-house census sa nagpadayong Census of Population and Housing tungod sa pagsaka sa ilang blood pressure epekto sa grabeng kainit sa panahon.
Kini maoy gipahibawo ni Dr. Riyamar Angtod ang Schools Superintendent sa dakbayan sa Sugbu nga niining bag-ohay lang mihunong ang duha sa ilang gibuhat human gipamatud-an sa medical certificate nga delikado kanila ang grabeng kainit sa panahon.
Duna hinuon gihulip nga duha ka magtutudlo gikan sa Bario Luz Elementary School sanglit ang usa niini ka enumerator gikan man sa maong tunghaan.
Giangkon ni Angtod nga dili gyud sayon ang pag-ilis og enumerator nga ihulip sa duha ka magtutudlo tungod kay kinahanglan pa nga adunay medical certificate ang magtutudlo sa dili pa uyonan sa NSO ug sa Department of Education (Dep-Ed).
Matud pa ni Angtod ila usab gipaminaw ang sitwasyon sa ubang magtutudlo kun makasugat kini og problema sa ilang panglawas.
Ilang gihangyo ang mga barangay opisyales sa 81 ka barangay dinhi sa siyudad nga moabag ug motabang sa mga enumerators ilabi na kun dunay mamatikdang dunay nanag-iya’g balay nga dili mokooperar sa mga enumerators.
Sa sayo pa, nangreklamo ang mga enumerators kay dunay uban nga gipagukod sa iro ug duna say uban nga bisan og unsaon pagtuktok ang pultahan sa balay dili gyud mangabli ang tagtungod niini.
Busa ang NSO padayong mihangyo sa publiko nga mokooperar sa enumerators ug kun sila nagduda mahimong pangitaan sa tagbalay og I.D ang mga enumerators. – BANAT NEWS