Guardo mipiyansa, mitiyabaw sa timing

CEBU, Philippines - Nakagawas na gikan sa detention cell sa National Bureau of Investigation kon NBI-7 ang negosyante ug naparot nga kandidato sa pagkakongresista sa Cebu City South District nga si Jonathan Guardo human kini makapiyansa sa kasong malversation of public funds.

Si Guardo nalutsan og warrant of arrest NCR-RTC Branch 11 Judge Cidero Jurado tungod sa kapakyas sa pag-liquidate sa P10 milyones   nga pundo sa Philippine Sports Commission sa pagpahigayon sa South East Asian Games dinhi sa Sugbu niadtong tuig 2005.

Si Guardo mipiyansa sa sala ni Regional Trial Court RTC-7 Branch 10 Judge Soliver Peras og P40 mil alang sa temporaryong kagawasan human dakpa niadtong adlaw’ng Huwebes sa hapon diha sa tennis court sa Alta Vista Golf Club sa barangay Pardo ning siyudad sa Sugbu sa mga sakop sa NBI-7.

Sa press conference human siya makagawas sa NBI mitumbok nga may pagduda siyang gituyo sa mga ahente sa NBI nga sikupon siya lapas na sa alas 5:00 sa hapon aron gyud makatulog sa karsel.

Gikatahong pito ka mga huwes ang gitawgan ni Guardo aron makapiyansa niadtong milabay’ng gabii apan pulos namalibad gumikan kay wala nay opisina hinungdan nga kini nakatulog sa karsel.

Nagduda usab si Guardo nga may kalambigitan ang iyang kaatbang sa politika sa iyang pagkaaresto sa kaso.

Si Guardo maoy chairman kaniadto sa Cebu City Sports Commission dihang mi-host ang siyudad sa Sugbu sa 23rd Southeast Asian Games sa tuig 2005.

Ang Philippine Sports Commission nipili kang Guardo nga maoy chairman usab sa Cebu SEA Games Organizing Committee ug maoy gihatagan sa P10 milyones nga financial assistance sa PSC.

Matud pang Guardo nga ang maong salapi gimando kaniyang ipatukod og mga edipisyo alang sa venue sa duwa sa karatedo, alang sa cycling ug uban pa nga sa iyang tan-aw kuwangon ra.

Mibutyag si Guardo nga wala siya magdahom nga malutsan og warrant of arrest tungod kay ila man gyud nga gitutukan ang maong kaso ug karon andam niya kining atubangon.

Mipasabot si Guardo nga iyang nagamit ang tanang kwarta apan dili sa imprastraktura sukwahi sa mando sa taga Commission on Audit kon COA maong iyaha kining gigastos sa operasyon sa duwa.  - Lesley Caminade ug Chester Abadilla (BANAT NEWS)