CEBU, Philippines - Ang kapolisan sa lalawigan molusad na sa ilang Oplan Balik Eskuwela ug makigtagbo sa kadagkoan sa nagkadaiyang pampublikong tunghaan ug mga ginikanan.
Si Sr. Supt. Erson Digal, director sa Cebu Provincial Police Office gikatakdang makigkita sa Parents Teachers Community Association (PTCA) sa nagkadaiyang pampublikong tunghaan sa dili pa pormal nga buksan ang klase karung sunod semana.
Lakip sa iyang pakigtagboan mao ang opisyales sa barangay aron makatabang sa seguridad sa mga bata ilabi na usab ang pagbutang og traffic aids diha sa dalan duol sa mga tunghaan.
Ang mga tunghaan nga nahimutang gikan sa dakbayan sa Talisay ngadto na sa Naga, samtang sa Norte ang lungsod sa Consolacion hangtud na sa Liloan maoy usa sa gipangandaman og maayo sa kapolisan gumikan sa problema sa trapiko.
Gawas niini pahugtan usab ni Digal ang pagbantay sa hugot nga seguridad sa mga pantalan ilabina diha sa Samboan ug Santander, dakbayan sa Toledo ug Bogo tungod sa mga pasaherong mangabot.
Butangan usab og daghang personnel ni Digal ang Cebu South Bus Terminal (CSBT) sa adlaw sa dili pa pormal buksan ang klase karung Hunyo 7 ug 15. (BANATNEWS)