Bacaltos mibahad nga mokiha

CEBU, Philippines - Ang kandidato sa pagka-mayor sa dakbayan sa Talisay niadtong milabay’ng eleksiyon nga si Raul Bacaltos mibahad nga mopasaka og kaso batok sa namunoan sa siyudad kung ang luna nga gitukoran sa merkado publiko sa barangay Tabunok ,ibaligya sa siyudad o kaha paabangan.

Si Bacaltos mibutyag kagahapon sa mga tigbalita nga ang nahisgutang lote gidonar sa pamilyang Nacario niadtong tuig 1959 dihang si Rafael Rabaya pa ang mayor sa lungsod sa Talisay.

Gitumong ang maong lote alang sa katukoran sa merkado publiko, apan kung ang maong luna ibaligya o kaha paabangan sa siyudad, mahibalik kini ngadto sa tag-iya kay siya man mismo ang mokiha batok sa siyudad.

Kahinumdoman nga ang siyudad mipatukod sa mibalor og minilyon ka pesos nga market-cum-terminal diha sa barangay Lagtang sa tumong nga mao na kini ang himuong merkado publiko, diin sa samang higayon adto usab ibutang ang paradahan sa mga jeep pasaheroan ug mga traysikol.

Apan sa gidaghanon sa mga naninda ug nanag-iya og stall diha sa merkado sa Tabunok dili kini masulod didto sa merkadong gitukod sa Lagtang.

Si Bacaltos nagkanayon nga ang labing maayong himoon sa siyudad mao ang paghimong duha ka andana sa merkado sa Tabunok imbes ibalhin ngadto sa Lagtang.

Gihugon-hugonan usab nga kung mabakante na ang merkado diha sa Tabunok tukoran kini og usa ka dakung tindahan.

Sa nasayran, unya sa Oktobre niining tuiga, gitakda ang pagbukas sa merkado sa Lagtang.

Ang maong merkado gitakda na unta kining ablihan niadtong miaging Marso ning tuiga apan tungod kay aduna pay ginagmay nga mga tiwasonon sa pagtrabaho sa edipisyo,   giuswag kini ngadto sa Oktobre. (BANATNEWS)