Negosyante'g utanon gipusil

CEBU, Philippines - Naangol ang usa ka negosyante og utanon sa merkado publiko sa dakbayan sa Lapulapu human gipusil lapas nang alas 12 kagahapon sa kaadlawon.

Ang biktima mao si Marlon Valler, 33, ulitawo nga nagpuyo sa sitio Tugas, barangay Gun-ob, dakbayan sa Lapulapu kinsa gipusil sa giilang usa ka “Nick” nga taga lungsod sa Cordova ug usa ka Junjun Ardiente nga taga Gun-ob, dakbayan sa Lapulapu ug negosyante usab og utanon sa maong dapit.

Si SPO1 Rex Ybañez sa Crime Against Person Desk sa Lapulapu City Police Office miingon nga si Valler naghiwa sa utanon nga paliya aron iladlad sa lamesa sa dihang si Nick nga naghupot og wala mailhing kalibre sa armas kalit lang mipusil kaniya makaduha ka higayon.

Si Valler naigo sa bukobuko apan nakahigayon kini sa pagdagan apan gisugat kini ni Ardiente ug gipusil na usab gamit ang kalibre .38 nga rebolber. Suwerte si Valler nga wala makaboto ang rebolber ug nakapadayon kini pagdagan paingon sa ikaduhang andana sa merkado publiko diin usab mahimutang ang buhatan sa Presinto 3 sa kapolisan sa maong dakbayan.

Nagdali sa pagtubag sa maong alarma ang kapolisan sa Presinto ug nagdali kini sa pagpanganaog sa ground floor sa merkado publiko apan wala na nila maabti sa maong dapit silang Nick ug Ardiente.

Gidala si Valler sa mga polis sa Presinto 3 ngadto sa Lapulapu District Hospital apan gibalhin kini sa Vicente Sotto Memorial Medical Center.

Sa mga pagsukitsukit nga gihimo ni SPO1 Ybañez iyang nasuta nga silang Nick ug Ardiente gikaaway na ni Valler sa miaging mga adlaw nga naglambigit sa ilang negosyo.  (BANATNEWS)