Mabdos napunggit sa hit and run bus

CEBU, Philippines - Kritikal ang kahimtang sa usa ka mabdos ug sa kapuyo niini human silang duha na-hit and run sa bus pasaheroan sa ilang pagtabuk sa karsada sa national highway sa barangay Guinsay siyudad sa Danao kagahapon sa alas 10:30 sa buntag.

Ang mga biktima mao ang manag-live-in partner nga sila si Joel Capol, 24, ug ang kapuyo niining mabdos nga si Hailane Jaime, 19, pulos molupyo sa maong lugar.

Samtang ang nakadasmag nila mao ang Ceres bus nga dunay body number nga 8738 nga gimaneho ni Melchor Tinedo Misamis, 32, taga barangay Guinacot Danao.

Matud ni PO1 Rommel Costan, traffic investigator sa Danao City Police dihang nahinabi sa Banat News ang mga biktima wala makabantay sa naghaguros nga bus gikan sa siyudad sa Sugbo paingon sa lungsod sa Carmen.

Matud sa mga nakasaksi wala na maka-apply og break ang maong bus ug nadasmagan gyud ang mga biktima nga miresulta sa ilang pagkalabay ug pipila ka metros ug pagtugpa nangapantok sa semento nga karsada.

Dugang inpormasiyon nga nahipos sa kapulisan nga nabali-an pa sa bukog sa hawak si Jaime ug gikabalak-an nga ma-apektuhan ang gisabak niini.

Ang bus inay mohunong ug motabang sa mga biktima mipabulhot na hinuon kini og padagan pahilayo sa lugar ug didto na motahan sa lungsod sa Carmen.   (BANATNEWS)