Motor vs. tricycle duha angol

CEBU, Philippines - Kritikal ang drayber ug ang pasahero sa motorsiklo human kini hidasmagi sa usa ka tricycle didto sa Purok Culo, barangay Cayam, lungsod sa San Remegio sa miaging gabii.

Ang mga biktima mao sila si Eleno Salvador Jr., 24, ulitawo, nga maoy nagmaneho sa motorsiklo, ug ang iyang amahan nga si Eleno Salvador Sr., nga maoy iyang pasahero, ug pulos taga Purok Nangka, barangay Cayam sa maong lungsod.

Samtang ang tricycle nga midasmag kanila gimaneho usab ni Ranilo Pepito Gomez, 25, minyo, nga silingan ra usab sa mga biktima.

Si PO3 Jovannie Placencia sa San Remegio Police Station mibutyag sa Banat News nga ang tricycle nagpaingon sa Cayam gikan sa Poblacion sa San Remegio, samtang ang motorsiklo paingon usab sa Poblacion gikan sa Cayam.

Apan sa pag-abot sa barangay Purok Culo, misuway og overtake ang tricycle sa sakyanan nga gisundan niini.

Apan sa paningkamot sa drayber nga makalusot miungot hinuon siya kay gikasugat man niya ang motorsiklo.

Ang motor nga duha ray ligid dali kaayong natikwang ug nangalagpot ang drayber ug ang sakay niini. – BANAT NEWS