CEBU, Philippines - Patay ang usa ka tawo ug naangol ang lima sa panagbangga sa usa ka bus de pasaheroan ug trak diha sa National Highway, Sta. Felomina lungsod sa Alegria, pasado alas 10:15 sa buntag niadtong milabay’ng adlaw.
Ang Ceres Bus Liner nga gimaneho ni Roque Balogno, 37, nga lumulupyo sa Sabellano Street, Quiot Pardo ning dakbayan mibangga ngadto sa Isuzu van nga gimaneho ni Antonio Mañacap nagpuyo usab sa Pardo ning dakbayan.
Matud pa ni PO3 Rene Avellar sa Alegria Police Station dihang nahinabi sa Banat News nga ang bus gikan pa sa siyudad paingon sa habagatang bahin sa Sugbu samtang ang trak paingon unta dinhi sa siyudad dihang nahitabo ang panagbangga.
Sumala pang Avellar nga dunay gilikayang bata ug tiguwang nga naglakaw sa kilid sa dalan hinungdan nga gilikayan niya kini apan wala mabantayi ang nagpadulong nga trak. Matud pang Avellar wala mohatag og lugar ang trak sa pagtipas sa maong bus hinungdan sa ilang panagbangga.
Ang mga pasahero sa bus nga naangol mao sila si Florencio Recaplaza, 30, usa ka miyembro sa Citizen Auxiliary Force Geographical Unit nga nadestino sa Barili.
Lakip sa naangol mao si Melien Aro, 24, nga taga barangay Montañeza lungsod sa Malabuyoc; Elves Mantalaba Apuran, 51; Adelfa Rodriguez, 19; ug Flacida Rodriguez, 59, ug si Mañacap.
Ang maong mga biktima nakaangkon og daghang pangos ug mga samad sa nagkadaiyang parte sa lawas ug gidala sa Reinhart Wertgen Memorial Hospital apan si Mañacap nakabsan sa kinabuhi. Samtang ang usa sa mga pasahero sa bus nga si Rodriguez, gibalhin sa Don Vicente Sotto Memorial Medical Center tungod kay talandugon ang kahimtang niini.
Ang truck adunay kargang mga baligya ug walay gikatahong naangol nga mga sakay. Samtang ang drayber sa bus nga si Roque Balogno nga aduna la’y gamay’ng bun-og sa iyang kamot, kasamtangang gitanggong samtang gihikay ang tukmang kasong ipasaka batok kaniya. – BANAT NEWS