Mar modaog apan...

CEBU, Philippines - Kun makadaog man ugaling si Sen. Mar Roxas, lamang susama kanipis sa buhok sa campaign manager sa Liberal Party nga si Florencio “Butch”Abad ang lead niini batok kang Makati Mayor Jejomar Binay, sumala pa ni Aquino-Roxas Bantay Balota, chief Avelino Cruz.

Si Roxas nagkumbitay karon aron makalingkod ihapay sa botos kumparar sa iyang kaatbang nga si Binay tungod sa kasikit sa biya sa botos sa duha.

“More or less, mga 200,000 votes ang magiging lamang ni Senator Roxas. Kasing nipis nung hairline ni Secretary Butch Abad,” pangomedya pa ni Cruz sa report sa GMA News.Tv.

Hinuon gitubag kini og pangomedya ni Abad nga dili nalang hisgutan ang kanipson sa iyang buhok.

Matud pa sa report nga ang LP nangangkong naa silay kopya sa tanang orihinal nga certificates of canvass sa tibuok nasud.

Isip usa ka dominant minority party, sama sa Parish Pastoral Council for Responsible Voting (PPCRV), ang LP aduna usab access sa servers sa mga munisipyo ug mga probinsya nga diin gi-transmit ang mga canvass.

Base sa data, si Roxas modaog pinaagi sa menos usa ka porsiyento sumala pa sa report.

Apan ang kampo ni Binay nakapanglantaw nang modaog batok kang Roxas sa 930,000 votes.

Sa laing bahin, ang PPCRV mipahibalong lugwayan pa nila ang manual counting sa nakalabay’ng eleksyon ug nagkinahanglan og dugang mga volunteers gumikan sa nagkadaghang nangabot nga election returns diha sa ilang command center sa Pope Pius XII Center sa Manila.

Ang mga ERs nga susama og porma og“grocery-list" printouts gikan sa mga Precinct Count Optical Scan (PCOS) machines nagrepresentar sa naihap nga mga botos sa matag clustered precinct nga diin gigamit ang maong PCOS machine.

Si PPCRV communications head Ana De Villa-Singson sa usa ka artikulong migawas sa Catholic Bishops’ Conference of the Philippines news site mipahibalong nagdugang sila og mga volunteers gikan sa Catholic Educational Association of the Philippines (CEAP) ug mga madre. – BANAT NEWS