Pagtipon sa mga lugar botahanan gikabalak-an

CEBU, Philippines - Si kanhi bokal Raul Bacaltos kinsa kandidato karon sa pagka-mayor sa dakbayan sa Talisay alang sa piniliay sa Mayo 10, mibati og kabalaka sa dakong kalagmitan nga daghang mga botante nga dili makabotar karong umaabot nga election gumikan niining sistema nga clustering o paggrupo-grupo sa mga sentrong botohanan.

Gibutyag ni Bacaltos sa Banat News nga gumikan niining clustering sa mga presinto, may mga botante nga nahitipon na sa laing hut-ong sa mga botante diin sa higayong tapolan na kini sa pagpangita sa ilang ngalan may kalagmitang dili nalang mamotar.

Matud pa niya nga sahi sa nanglabay nga eleksiyon naandan na sa ubang mga botante nga makigdungan sa ilang mga silingan og botar ilabi na ang mga tiguwang kinsa mamalihog na lang sa pagpasil-ing sa ilang mga ngalan kun asa na silang presintoha mahilista.

Si Mariela Remoroza, election assistant sa dakbayan sa Talisay hinuon mipasabot nga gihimo sa Comelec ang pagtipon-tipon sa daghang mga botante sa usa ka presinto tungod kay limitado ra ang precint count optical scan (PCOS) nga gamiton sa umaabot nga piniliay.

Nasayran nga sa matag gi-cluster o gitapok-tapok nga presinto may gidaghanong dili mominus 1,000 ka mga botante ang sulod niini.

Gibutyag usab ni Remoroza nga ang Talisay dunay 578 ka mga presinto ug may 115 nga gi-cluster. (BANATNEWS)