CEBU, Philippines - Gisaway sa kampo ni Kongresista Nerissa Soon-Ruiz nga napasagdan na ang bag-ong ihawan sa dakbayan sa Mandaue diha sa barangay Labogon nga dugay na untang nahimong Triple A category apan nausik ang pundo sa siyudad tungod kay wala kini gamita.
Ang kampo sa oposisyon pinangulohan ni Bise Mayor Carlo Fortuna gisayangan sa dakung gasto sa siyudad sa pagpatukod sa maong modernong merkado niadtong 2006 panahon ni kanhi mayor Thadeo Ouano.
Ang gisayangan sa mga sakop sa oposisyon nga maoy mayoriya diha sa konseho tungod kay bisan wala gamita ang maong merkado nga accredited sa National Meat Inspection Commission (NMIC) apan minilyon gihapon ang gastos niini sa maintenance.
Gihimong sanglitanan ang na-aprobahang gahin sa konseho niadtong 2007 nga miabot og P14.7 milyones alang sa maintenance niini. Sa pagka 2008 laing P1.2 milyones ang gi-aprobahang gahin alang sa suholan sa mga kawani matag buwan ug laing P8 milyones alang sa maong ihawan.
Apan namatikdan nga wala kini makabawi sa gasto tungod kay wala na kaayo’y magpaihaw niini gumikan usab sa kagrabe sa traffic diha sa barangay Basak ug ang mga bayranan pagsulod sa maong pasilidad. (BANATNEWS)