Kandidato sa One Cebu duble kara

CEBU, Philippines - Napakyas sa pagpasabot si Capitol consultant Rory Jon Sepulveda bahin sa isyu nga “duble kara” ang mga kandidato sa One Cebu Party.

Kini sa dihang nabaniog ang mga estorya nga nanawat diay kuno og tag P100 mil ang mga mayor sa maong partido gikan kang Senador Manuel Villar, ang kandidato pagka-senador sa Nacionalista Party(NP), human sila makadawat sa mao gihapong kantidad gikan kang kanhi Defense Secretary Gilberto”Gibo” Teodoro, ang kandidato pagka-presidente sa Lakas Kampi CMD Party sa miaging semana.

Si Gibo maoy gipaluyohan sa One Cebu Party ug gipanumpaan na kini sa mga mayor ug tanang kandidato nga sakop sa maong partido.

Sa pagkakaron wala pa matino ang loyalidad sa mga opisyal; sa One Cebu Party ug maoy hinungdan nga ginganlan sila nga duhay nawong o duble kara.

Hinuon may mga opisyal sa One Cebu nga nanghimakak ning maong taho kay matud pa mga pagdaot lamang kini sa oposisyon o kaatbang sa partido.

Kini luyo sa kamatuoran nga ang nagpakita og kaisog nga dali kaayong mibiya sa One Cebu mao si Kongresista Nerissa Soon Ruiz gumikan sa kaikog niya kang Villar kay dako ang gihatag niini kaniya.

Sayo niini daan nang gisaad ni Gobernador Gwen Garcia, ang lider sa One Cebu Party nga kutob sa mga mayor nga mamatud-ang nanawat usab og suborno gikan sa ubang partido mahimong papahawaon sa One Cebu.

May kalagmitang may madawat pang dugang salapi ang mga mayor ug mga Kongresista sa lalawigan sa Sugbo human masayri nga ang gipanghatag ni Villar sa miaging semana matud pa, acceptance fee pa lang kadto sa ilang pagsuporta sa NP.

Kining tanan gisuta pa ni Sepulveda. – BANAT NEWS