Oposisyon punay la'g panaway

CEBU, Philippines - Ang grupo sa administrasyon sa dakbayan sa Talisay misaway sa oposisyon kay pulos lang pangatake ang gibuhat atol sa ilang pangampaniya.

Si Talisay City Administrator Richel Bacaltos kinsa maoy campaign manager sa grupo sa administrasyon mibutyag sa Banat News   nga nakugang sila sa gipakitang video sa grupo sa oposisyon kay pulos lang kini panaot ug pangatake ngadto sa administrasyon. Sumala sa mga supporter sa administrasyon nga nakakita sa mga salida sa video sa oposisyon nga ang problema kuno kabahin sa drainage system sa siyudad, pagdupa-dupa sa mayor ngadto sa iyang sinagop, problema sa pagkolekta sa basura ug ang usa ka sakop sa konseho nga natulog samtang nagsesyon.

Ang city administrator nagkanayon nga wala sila magdahom nga mao diay kini ang estelo sa pangampanya sa oposisyon. Gipasabot niya nga ang tanang mga problema sa siyudad gihatagan og mga paagi nga masulbad lakip ang bahin sa isyu ni Joavan .

Si Bacaltos midugang nga pasagdan lang sa mayor ang nahisgutang pagdaot sa oposisyon ngadto kanila ug ang katawhan na lang ang pahukmon.

Sa laing bahin, si Raul Bacaltos kinsa mikandidato isip mayor sa Talisay kontra ni Fernandez nakapangutana kun dili ba tinuod ang ilang mga gipakita sa video nga mga problema sa siyudad.

Matud niya nga walay dautan sa ilang gibuhat tungod kay gusto lang nilang masayran sa katawhan ang gisagubang nga problema karon sa siyudad. – BANAT NEWS