Bigtime pusher sikop sa Bulacao

CEBU, Philippines - Usa ka tawong gidudahang big-time drug pusher nasikop sa mga polis   sa barangay Bulacao, dakbayan sa Sugbo kagahapon sa kaadlawon. Ang nadakpan mao si Christopher Anticristo,36, nga taga Sitio Ubca, barangay Quiot, dakbayan sa Sugbo .Ang Cebu City Intelligence Branch sa kapolisan sa Sugbo maoy nakadawat og tawag gikan sa usa ka tawo nga nagpahibalo bahin sa usa ka giingong armadong tawo nga nagsakay og multicab nga adunay plate number nga GXH-583 ug nagpaingon sa Bulacao.

Miresponde dayon ang kapolisan ug didto naapsan nila sa Bulacao ang nahisgutang sakyanan.

Sa dihang gipara, girikisa dayon nila ang suspetsado apan dili armas de fuego ang nakuha nila kun dili usa ka dakong putos sa shabu nga gibanabana nilang may gibug-atong 5 gramos.Si PO3 Buenaventura Ursaiz sa Cebu City Police Office mibutyag nga si Anticristo maoy giingong tigsuplay og shabu sa barangay Bulacao ug Pardo, ug nailhan nila kining usa ka bigtime nga drug pusher.

Sa pagkakaron nagtingkagol na sa prisohan ang suspetsado samtang gihikay na ang tukmang kaso nga isang-at batok kaniya. (Lesley Caminade)   (BANATNEWS)