CEBU, Philippines - Gumikan sa komedya, gidunggab sa usa ka trabahante ang iyang kauban sa trabaho didto sa sitio Tamiya, barangay Basak, dakbayan sa Lapulapu kagahapon sa kadlawon.
Ang biktima mao si Crisanto Alverio, 27, ulitawo nga lumad sa Indang Leyte ug anaa ra kini magpuyo sa gitrabahoang konstraksyon niini sa Tamiya, samtang ang suspek mao ra usab ang kauban niya sa trabaho nga si Allan Walo, hingkod , taga Leyte gihapon ug kaipon ra sa pagpuyo sa biktima..
Si SPO2 Frederick Eslit sa kapolisan sa Lapulapu mibutyag sa Banat News nga gikan sa ilang trabaho nag-inom ang duha apan sa pagka- alas 3:15 sa kaadlawon samtang nangalasbag na sila, mitumaw ang panaglalis nila gumikan sa komedya. Ang suspetsado nga naputong milanit sa iyang kutsilyo ug giduslak ang walang bahin sa dughan sa biktima.
Ang biktima gihatod dayon ngadto sa Lapulapu City Hospital samtang gipangita pa sa kapolisan ang suspetsado kinsa nakasibat human sa hitabo. - Bong Soriano (BANAT NEWS)