CEBU, Philippines - Duha ka estudyante ang napusilan, usa niini ang namatay sa tambalanan human gipusil sa mga lalaking nagsakay og awto nga Toyota Corolla pasado alas-dos sa buntag kagahapon sa sitio Tugas barangay Pardo.
Ang namatay mao si Joperin Limbag Birondo, 31, taga sitio Lawis barangay Pasil ug estudyante sa TESDA isip welder trainee samtang nasamdan usab si Ronnel Sinco Galen, 26, taga Forest Hills, sa Banawa barangay Guadalupe, nga classmate sa namatay.
Nasayran nga ang duruha gikan sa usa ka birthday party sa usa ka higala nga si Charlie Labrada sa sitio Laray barangay Inayawan ug padulong nang mamauli niadtong tungura.
Apan samtang nagbarog-barog pa ang duruha daplin sa karsada kalit lang nga adunay miagi sa ilang tungod nga sakyanang Toyota Corolla nga kolor blue ug ang sakay niini miabli sa bintana dayong pusil kanila makadaghang higayon.
Si Birondo naigo diha sa likod nga bahin sa ulo nga nakaingon sa kamatayon niini samtang si Galen nakaangkon og samad pinusilan sa likod nga bahin sa abaga ug liog ug gidala sa Cebu City Medical Center.
Sa pakighinabi sa Banat News ni SPO3 Rey Cuyos nagkanayon kini nga wala pa gyud sila’y ideya kun unsa ang motibo sa maong pagpamusil tungod kay walay kontra sa maong dapit ang duruha ug dili usab sila miyembro sa bisan unsang gang o fraternity.
Samtang sa usa ka report sa usa ka sibyaanan kagahapon nga dunay mga residenteng mireklamo diha sa maong dapit nga mibasol sa mga polis sa Pardo nga dugay kaayong miresponde sa hitabo.
Apan sa pakighinabi sa Banat News ni Senior Inspector Ciriaco Cortuna Jr. nagkanayon kini nga walay kamatuoran ang maong alegasyon tungod kay ang iyang mga tawo pa gani maoy nauna sa maong lugar nga miresponde.
Gihulagway usab ni Cortuna nga nagginukuray pa ang iyang mga sakop uban sa nangabot nga Mobile Patrol Group ngadto sa mga gikatahapan apan wala na nila maabti.
Samtang mipasabot usab si Cortuna kabahin sa nakuha nilang upat ka buhing bala sa kalibre .38 kini posibleng nag-reload ang mga mamumuno ug nangatagak sa pagdali-dali. (BANATNEWS)