Loot wala manghilabot sa CPPO - Digal

CEBU, Philippines - Wala manghilabot sa kalihukan sa kapulisan sa lungsud sa Daanbantayan ug sa probinsya sa Sugbu si Sr. Supt. Vicente Loot ang deputy regional director for operation sa Police Regional Office (PRO-7).

Kini maoy agi og pagklaro ni Sr. Supt. Erson Digal ang director sa kapulisan sa lalawigan sa Sugbu subay usab sa pasangil sa mga kaatbang sa pulitika sa asawa ni Sr. Supt. Loot nga si Bise Mayor Maria Luisa Loot diha sa Daanbantayan.

Si Digal miingon nga wala gyud siya makadawat og report gikan sa iyang mga sakop sa Daanbantayan nga nanghibaot si Sr. Supt. Loot sa ilang mga trabaho.

Kini sukwahi sa mga pasangil sa kaatbang sa pulitika sa asawa niini. Si Engr. Augusto “Itok” Corro nga midagan sa pagka-mayor sa lungsod atbang sa kapikas sa koronel mipadangat og reklamo niadtong milabay'ng semana kabahin sa presensya ni Sr. Supt. Loot dinhi sa Sugbu.

Apan si Digal sa iyang bahin miklarong wala manghilabot si Loot sa iyang kalihukan diha sa CPPO. Si Sr. Supt. Loot kanhi director sa CPPO ug karon mao nay Deputy Regional Director for Operations sa Police Regional Office-7.

Hinuon iyang giklaro nga kun duna gyu'y modusog reklamo diha sa ilang buhatan nga nanghilabot ang maong opisyal sa gimbuhaton sa kapulisan sa Daanbantayan ug mag-apil-apil sa pulitika andam silang mo-imbestigar niini.

Gidepensahan usab ni Digal ang ilang labaw nga si Chief Supt. Lani-O Nerez, ang pangulo sa Police Regional Office (PRO-7) kinsa gipasanginlan sa grupo ni mayoralty bet Augusto Corro nga dili makiangayon.

Si Nerez niadtong milabay'ng semana namahayag nga di niya ipabalhin si Loot gawas sa PRO-7 kun walay basehanan ang mga pasangil.

Si Loot gipasakaan og kaso sa milabay'ng 2007 elections tungod sa giingong pag-apil apil niini sa pangampanya sa kapikas, pagpang-checkpoint ug uban pa, mga pasangil nga gipanghimakak sa opisyal nga na-dismissed sa korte.   (BANATNEWS)