CEBU, Philippines - Wala makaipsot sa mga sakop sa kapolisan ang usa ka babaye nga naghupot og ilegal nga drugas atol sa gipahigayong "saturation drive" sa mga sakop sa Intelligence ug City Anti-Illegal Drug Special Operation Task Force (CAIDSOTF) sa Soong 1, barangay Mactan, dakbayan sa Lapulapu sa milabay’ng gabii.
Ang nasikop mao si Editha Bahio alyas Edith, 49, minyo ug residente sa maong dapit.
Matud ni PO1 Michael Rubia sa CAIDSOTF nga gumikan sa taho nga naghitak ang ilegal nga drugas sa maong dapit gisurpresa nila kini sa pagduaw. Ang tropa gipangulohan ni SPO1 Nonilon Estonilo.
Atol sa operasyon mga alas 7:30 sa milabay’ng gabii, si Bahio nga nagpa-manicure kalit mikaratil og dagan hinungdan nga gigukod kini sa kapolisan.
Pipila ka metros sa pagdagan ni Bahio, buot unta niining ilabay ang drugas nga anaa sa iyang mga kamot apan nagunitan kini sa kapolisan.
Nakuha gikan ni Bahio ang duha ka gagmay’ng pakete sa gituhoang shabu hinungdan nga kini gidala sa buhatan sa kapolisan ug gibilanggo.
Matud pa ni PO1 Rubia ila nang gisumiter ngadto sa PNP Crime Laboratory ang nakuhang ebidensiya alang sa konpirmasyon, samtang giandam na usab nila ang pagpasaka og kasong kalapasan sa Akta Republika 9165 gumikan sa paghupot og ilegal nga drugas. - Bong Soriano (BANAT NEWS)